Kuki Christian Conventin at Kalay, 2010
Pathen mapui na jal in a (1) vei na Kuki Christian Convention (khoppi) chu December 18-20, 2010 sung in Tahan khopi mun a phate chan ana ki mang khom e. Hiche Kuki Christian Convention a hung lha hi Kuki chate ngen mi 200 val aphan ahi. Kuki Christian mi 200 val in Tahan khopi mun a Pathen thu kihilna leh Pathen houkhomna aki nei hi alou pi lheh jeng in, Pathen vahchoi chim jou ahi poi.
Hiche Kuki Christian Convention a hung lha ho hi kho 12 (Tongkyaw, Voksu, Nongket, Valpabung, Nanpalong, Tamu, Namihan, Twidimjang, Bokkan, Kanan, Tingkaya leh Khamphat kho ho) a kon ahi. Hiche khoppi hi koima khan louva kibol ahin, ahung lhanom jouse hung lhah ahi. A hung lha ho hi Christian Church, Baptist Church, Roman Catholic, Salvation Army, Seventh Day Adventist, Assembly of God, leh pawl dang houbung chom choma kon ahiuve.
Hiche Convention a hin America pan a hung kal song Pu Chuck in “Bible Thukholdan†kicheh tah leh giltah in ei hil un, Pi Mary in Bible sunga “Ruth Hinkho Thusim†a kon in tilkhouna anei jin, keima (Nehkholal) in “Houbung Umdol†thun houlimna ka nei je. Ka houlimnao ho hi lekha a kihom soh kei ahin, ahung lha mipi te hon aphat chom pi lheh uve. (Koi ta bang asim nom aum leh contact bol thei ahi).
Hiche khoppi bolna ding mun thua hahsat na tam pi ana um e. A jeh pi pen chu gamdang mi te ho hi ichennao Kabaw Valley langa pui lut thei lou ahi. Hijeha alhun thei nao chan Kalay Myo leh Tahan a ki bola hi. Tahan Theological College campus (mun thah) lentah sunga nom tah in khoppi aki mang khom in lhunna, gena, an neh tuidon semna leh kikhop na anom lheh e. TTC Chapel a kikhop khomna aki mang in ahung ki khom mi 200 ding a kitoh chet ahi.
Tu chung Kuki Christian Convention hi aja pha chan atha nom in, ahin natoh khoh lai tah ahi jeh in ahung lha nom jouse ahung lha jou pon ahi. Hiche khoppi a hin, kum 70 chung lam upa mi 15 vel ahung lha thei un kipa aum lheh e. Ama ho hung lhah hin ahung kalsong hi atha nop sah lheh in ahi. Kum tam in tehlheh u jong leh Pathen thua kikhopna a ahung lhah u chu ama ho ding leh ahung lha khangthah ho dinga kitil khou na tah ahi.
Hiche khopi lemnan Nanpalonga Pa Pakang in pengkul amut in, nulepa te hon Pu Pa Lan lemna la asauve. Chule Khopi sunga hi Khangdong lasa loi jong mi 20 val jen aum in, kikhop na sunga vahchoi la ngai tah tah ei sah peh un, mipi te lung sung asu hal lheh e.
Hiche khopi a hin vang set na jal a khut le keng bulhing lou ho jong pha chom pi ahung lhau ve. Ama ho kimuto pi na leh tao peh na aki mang e. Akim khat ho hi aneova pat a polio hung vei loi jong aum in, akim khat hi alet nunga lou kap khel jeha hing mo jong aum ve. Ama ho aki hop lo pen na tah chu ahi leh tahsa lama lhahsam na um kha ta jong leh lhagao lama atha hat jing diu dei na jal a ama ho jong hung lha dia ki tem ahi. Ama ho jong akipah thei lheh uve. Pathen in ei lam pui u leh ama ho mi 5 a dinga kitolna (wheel chair) khat cheh choh peh ding ngaito aum in ahi.
Tu chung khopi hi Kuki Christian te leh America mite ho khopi man khom na akhat vein a hin, ahung kalsong America te nileh ahung lha mi 200 val chu Pathen mingailut na chun ei kan khom un, ki khen ding hah aki sa cheh e. Pathen in dam a ei pui ho kit u leh mailam teng leh hisanga tamjo bol ding mipi ten aki ngai chah lheh e.
Pakai Lhacha
Nehkholal
Yangon
Kipa aum lheh e. Hitabang thilhoi tah khat nabol doh chu. kei thanop naho ahi. Keima jong Web tamtah kasem in,. Hetding kathei jilou jeh in ima jong kamoul so doh jipoi. Kaki pah e.